صديق قمبراڻي
صديق قمبراڻي
صديق قمبراڻي: مشهور ملهه پهلوان صديق قمبراڻي 1942ع ڌاري ڳوٺ آراڙو ڀرڳڙي، تعلقي سامارو ضلعي عمرڪوٽ ۾ پيدا ٿيو.ِ سندس والدين اتان لڏي تعلقي ڪوٽ غلام محمد ۾ رهائش پذير ٿيا. هن کي ملاکڙن ۾ پهلوانن کي ملهه وڙهندي ڏسي ملهه سکڻ جو شوق ٿيو. پوءِ ٻاويهن سالن جي عمر ۾ هن پنهنجي ڳوٺ جي هڪ پهلوان دودي شيديءَ کان ملهه جي باقاعدي سکيا ورتي. مڪمل انگ سکڻ کانپوءِ کيس استاد شاگردي جو ڌاڳو ٻڌي ملاکڙن ۾ ملهه وڙهڻ جي اجازت ڏني. هن ٽئين جوڙ ۾ ملهه وڙهڻ جي شروعات ڪئي. مختلف ميلن ۾ ٿيندڙ ملاکڙن ۾ مسلسل ڪاميابي ماڻڻ تي جلدي ٻئين جوڙ ۾ داخل ٿيو. ٻئين جوڙ ۾ يڪي خاصخيلي کي استاد ڪيائين ۽ وٽائنس شاگردي جو ڌاڳو ٻڌايو. ٻئين جوڙ ۾ ڏهن سالن تائين وڙهيو، جنهن بعد پهرين جوڙ ۾ شامل ٿيو ۽ سڄي سنڌ جي ڳوٺن توڙي شهرن جي ملاکڙن ۾ اتر سنڌ جي پهلوانن کي شڪست ڏئي گهڻا انعام ماڻيائين ۽ چڱو نالو ڪمايائين. هو پهرين جوڙ جو بهترين پهلوان هو. هميشه لاڙ جي پهلوانن جي طرف کان ملهه وڙهندو هو. اتر جي تمام مشهور پهلوانن سان مقابلا ڪري شڪست ڏنائين.